პატარა ზომის მწვანე პამიდვრები დავჭრათ რგოლებად, დავაყაროთ ცოტა მარილი და გავაჩეროთ 3-4 საათი, რათა დაწუროს ზედმეტი წვენისაგან. წვრილი, ქართული ხახვი დავჭრათ რგოლებად; ასევე რგოლებად დავჭრათ თესლგამოცლილი ბულგარული წიწაკა. ნიახური, ქინძი, კამა, ოხრახუში, რეჰანი დავჭრათ წვრილად და მწვანე პამიდორთან ერთად მოვათავსოთ დიდ ჭურჭელში, დავასხათ ზეთი და ძმარში გახსნილი ხმელი ქინძი, უცხო სუნელი, ზაფრანა, შავი წიწაკა, წითელი წიწაკა, ნიორი, მარილი. ყველაფერი ეს გავაჩეროთ ერთი დღე-ღამე, დროდადრო ფრთხილად ვურიოთ, ჩავაწყოთ ქილებში და მოვუკრათ თავი. ასეთი სალათა (ისევე როგორც კომბოსტო) შეიძლება შევინახოთ გარკვეული დროით გრილ ადგილას და როცა დაგვჭირდება გამოვიყენოთ. მასალა: მწვანე პამიდორი - 5 კილოგრამი ხახვი - 1,5 კილოგრამი ნიახური - 200 გრამი ქინძი - 300 გრამი ოხრახუში - 300 გრამი რეჰანი - 100 გრამი კამა - 200 გრამი ბულგარული წიწაკა - 2 კილოგრამი ნიორი - 100 გრამი ზეთი - 2 ლიტრი ძმარი - 2 ჩაის ჭიქა წითელი, შავი წიწაკა, მარილი - გემოვნებით